dinsdag 15 mei 2018

HoeTchieKoe herbeluisterd | Dichterskoets | Bert Scheuter

Bert Scheuter | Hofshuus 1 | De plaatse laezen 

Hofshuus I
De plaatse laezen.

De plaatse hier is older dan ‘t huus. 
Ik kieke wel, maor zien doe’k haost niks. 
Een zoch van de wind, een balkengekraak 
duudt an dat de plaatse ‘eleazen wil worden, 
bezuuken is zuuken naor ‘t verhaal in de maak. 

De plaatse hier is older dan ‘t huus. 
De eersten diet hier gingen bouwen 
doet mien niks meer an de hand. 
Mien oge zut niet meer wa’k vinden wil: 
eure spoors van leaven op eur eerste land. 

Ik kieke dale - i-j doet wat a’j zuukt - 
bunt ze daor warkelek? In ‘t gruus en stof 
dat eeuwenlang de eeuwen al versluiert? 
Ik laot de keurntjes deur de hände gaon 
en wet inens: deels hebt ze hier deur ‘ekuiert. 

Ik kieke naor baoven - zonder vertrouwen - 
een hemel gaf ‘t nog niet in eurluu tied. 
Een spraon jeg een spränksken lech vort: 
zie zaggen de loch anders ‘t zelfde as ik. 
Miene ógen allene schiet hulp’loos tekort. 

Teikens staot aoveral, maor tussen de regels.
 ‘t Verhaal van dit huus least as een gedicht: 
met oorne en ogen, met een gevuulegen hand, 
met een warm harte, met heel miene zeele, 
leaz’ ik ‘t verhaal van dat volk in de wand. 

uit de cyclus Olde Muurn 
12 - 14 juli 2006 

Bert Scheuter

Geen opmerkingen:

Een reactie posten